Rom 16 | AOJFILIFITA | STEP | AeꞋ aꞋipipa ma pimafi Fibi andeandeꞋ, akwaꞋw henitiꞋmafa afaꞋikwi kwandaꞋ maol kwagiambama esis Kristen sape Senkria.

Romans 16

Pol naꞋipasa nemaf buꞋunai amam nematawa hiesi

1 AeꞋ aꞋipipa ma pimafi Fibi andeandeꞋ, akwaꞋw henitiꞋmafa afaꞋikwi kwandaꞋ maol kwagiambama esis Kristen sape Senkria. 2 Fibi kwape laꞋifikwa Dembinai. EaꞋ ipeꞋ pesoꞋ opalefa akwaꞋw siꞋi waf buꞋunai apeꞋ amam nematawa Godi mandaꞋanai. IꞋi akwaꞋw okom nimanina ma anom amamaga, ipeꞋ pigiambamaꞋw. DeiꞋ main, akwaꞋw kwagiambama aeꞋ wapotiꞋ.

3 IpeꞋ pendaꞋmas nemaf buꞋunai Akwila naloma wauluꞋmana Prisila eaꞋ piꞋipaso danifel aeꞋanai. Esis bias apeꞋ mandaoꞋoma mandaꞋ maol etin Krais Jisasi. FowaꞋ esis sandandombol endilisi ma sagiambama aeꞋ. Nemaf anama enis saꞋi sehe, esis ina umbamahas, owaꞋ. 4 SaꞋi awi ma sogaꞋ sigiambama aeꞋ epe namowe. EaꞋ ina aeꞋ atowe anifela esis bias, owaꞋetin. Esis Kristen hiesi fowaꞋ sololama Godi wapotiꞋ, sanifelis. 5 EaꞋ ipeꞋ peseꞋasa nemaf buꞋunai ma danifela aeꞋanai esis Kristen isima safeꞋ sandatama etifigin sape ipat asasinai. EaꞋ piꞋipago Epainetus nemaf buꞋunai aeꞋanai anan alupunai aeꞋanai endilisi. Anan naliꞋ nombaleꞋef Krais naliꞋma epes hiesi etap hiagoma Esia. 6 IpeꞋ pendaꞋmakwago nemaf buꞋunai Maria. AkwaꞋw kwandaꞋ maol luꞋunai ma kwagiambamepa.

7 IpeꞋ peseꞋamo danifel noloma nemaf buꞋunai aeꞋanai ma amam amama Andronikus noloma Junias, amam wapotiꞋ Judaimi siꞋi aeꞋ. Amam mandaꞋ kalabus maloma aeꞋi. Amam aposel maꞋi amam biam mandaꞋ maol buꞋunai Godi. Amam maliꞋma aeꞋ mombaleꞋefa Krais.

8 IpeꞋ piꞋipago Ampliatusa nemaf buꞋunai ma danifel aeꞋanai. Anan alupunai aeꞋanai endilisi ma nape laꞋifinama Dembinai.

9 PiꞋipago Urbanus nemaf buꞋunai aeꞋanai, anan nandaꞋ maol atotona naloma aeꞋ ma maol Kraisi. EaꞋ iꞋipago Stakisa nemaf buꞋunai wapotiꞋ. Anan alupunai aeꞋanai endilisi. 10 EaꞋ piꞋipago Apelesa nemaf buꞋunai aeꞋanai, anan agel nandawalapana naila Krais endilisi. PiꞋipasago danifel ma nemaf buꞋunai aeꞋanai ma esis sape ipat atotonai Aristobulusi. 11 PiꞋipago Herodiona nemaf buꞋunai aeꞋanai, anan Juda wapotiꞋ siꞋi aeꞋ. PiꞋipasago danifel ma nemaf buꞋunai aeꞋanai esis wambota atotona Narsisusi sombaleꞋefa Dembinai. 12 PiꞋipawago nemaf buꞋunai aeꞋanai ma Trifina kwaloma Trifosa, awo biawa wandaꞋ maol luꞋunai Dembinai. PeseꞋakw nemaf buꞋunai aeꞋanai ma Persis, akwaꞋw alupuꞋwi aeꞋakwi endilisi, kwandaꞋ maol luꞋunai ma Dembinai. 13 PiꞋipago Rufusa nemaf buꞋunai anan epen buꞋunai naloma mamaꞋwana ananiꞋwi aeꞋ wapotiꞋ efalaꞋw mamaꞋwe. 14 PiꞋipasago danifel aeꞋanai ma nemaf buꞋunai ma Asinkritus, Flegon, Hermes, Patrobas, maloma Hermas, eaꞋ esis Kristen sape saloma esis. 15 IpeꞋ piꞋipasago nemaf buꞋunai neloma danifel aeꞋanai ma Filologus noloma Julia, eaꞋ Nereus noloma henitiꞋmana ananiꞋwi, eaꞋ Olimpas, soloma esis amam nematawa hiesi Godi sape saloma esisi.

16 Waf anama apeꞋ amam nematawa Godi, ipeꞋ hipei atona etin peseꞋasa lagof esis sahin owan hiesi pinifelis. Amam nematawa Kristen hiesi sape naꞋae sandaꞋmepago nemaf buꞋunai sandanifamepa.

Enis epes sandaꞋ esis Kristen sandawal biefis sandaꞋas awes

17 Alupipei, aeꞋ aꞋipipa basef laꞋifimi pindumafuma andeandeꞋ pepoma enis epes sandaꞋ waf aonai sandaꞋ ipeꞋ Kristen pendawal biefipa sosambala basef amama ipeꞋ pefaꞋami. Waf anama esis sandaꞋ epes hiesi sandaꞋ waf aonai. IpeꞋ peseꞋas alafugah epes isima. 18 Esis ina sandaꞋ maola Dembinai apeꞋinai Kraisi, owaꞋetin. Saila ukupa alop asasinai atona. SandaꞋ basef atom usiusihimi ma sambasoꞋma opalef saꞋipa epes isima owaꞋ sogawa andeandeꞋ waf aonai o buꞋunai. 19 IpeꞋ paila God, deiꞋ epes hiesi sogawepa eaꞋ. Amama atom deiꞋ aeꞋ andanifel ma ipeꞋ. AeꞋ aꞋi ipeꞋ pegawa waf buꞋunai endilisi, eaꞋ ipeꞋ ina pegawa waf aonai, owaꞋ. 20 God anan ofagonama opaf awanena, nogota bandana ma nofaꞋasa Satan nofeꞋ owina boꞋwagah ipeꞋimi. AeꞋ ahaliꞋ God andaꞋ betena Dembinai apeꞋinai Jisas Krais nigiambamepa naꞋa nope laꞋelaꞋef nolomepa.

Enis epes sandaꞋ nemaf buꞋunai saꞋipa esis Rom

21 WandaꞋ maol atini Timoti anan nasapaꞋago danifel ma nemaf buꞋunai ma ipeꞋ. Lusius naloma Jeson naloma Sosipater, amam Juda wapotiꞋ siꞋi aeꞋ, amam wapotiꞋ masapaꞋ nemaf buꞋunai ma ipeꞋ. 22 AeꞋ Tertius, efaꞋ malogola Pol andaꞋago basef amama. AeꞋ asapaꞋ basefa nemaf buꞋunai mafeꞋmago ipeꞋ ma agel Dembinai apeꞋinai. 23 Gaius nasapaꞋago danifel nemaf buꞋunai ma ipeꞋ. Anan numafi aeꞋ Pol andeandeꞋ ipat ananinai, eaꞋ numafi esis Kristen hiesi wapotiꞋ safiꞋi sandatama etifigin naꞋae. Erastus anan nandaꞋ maola gavman numafi otamba taun wambel anama, eaꞋ sahalomapa apeꞋinai Kwartus, amam biam masapaꞋo basefa danifel nemaf buꞋunai ma ipeꞋ. 24 [AeꞋ andaꞋ betena Dembinai apeꞋinai Jisas Krais nigiambamepa naꞋa numafipa ma nope nolomago ipeꞋ hipei. Endilisi.]

ApeꞋ mefela agel Godi

25 ApeꞋ mefela agel Godi luꞋuna. Anan laꞋifinai ma nondaꞋepa petaga laꞋifipa ma basef buꞋwami ananimi awalapami, amama basef buꞋwami maꞋi Jisas Krais. Basef amama fowaꞋ nimeguf hiami ataꞋ mape mandambahoꞋ, eaꞋ deiꞋ mataga alihima basef amama fowaꞋ amam profet mandaꞋami afaꞋ wawalapam alihim. God nape namunai laꞋelaꞋef naꞋi basef laꞋifimi ma basef amama buꞋwami deiꞋ mataga mandawalap alihima epes hiesi etap anama hiagoma ma esis hiesi sembaleꞋefana. 27 Anan atotona nogawa endilisi. ApeꞋ mefela agel ananinai laꞋelaꞋef. Jisas Krais atona nogiambamapa mondaꞋam naꞋama. Endilisi.